कञ्चनपुर निर्वाचन क्षेत्र नं. ३ क बाट राष्ट्रिय प्रजातन्त्र पार्टीका जोशीको उम्मेदवारी दर्ता

महेन्द्रनगर । कञ्चनपुर निर्वाचन क्षेत्र नं. ३ क बाट राष्ट्रिय प्रजातन्त्र पार्टीका सुदूरपश्चिम प्रदेश अध्यक्ष धर्मराज जोशीले उम्मेदवारी दिएका छन् । मुख्य निर्वाचन अधिकृत कार्यालयमा जोशीले दिउँसो उम्मेदवारी दर्ता गराएका हुन् ।

जोशीको उम्मेदवारीमा तिर्थराज चटौत प्रस्तावक र दशरथ जोशी समर्थक बसेका छन् । उम्मेदवारी दर्ताका लागि राप्रपाका अध्यक्ष गजेन्द्र बहादुर चन्द सहित नेता कार्यकर्ता मुख्य निर्वाचन अधिकृत कार्यालय पुगेका छन् ।

राप्रपा अघि एमालेले उम्मेदवारी दर्ता गराएको थियो । कञ्चनपुर ३ क मा एमाले र राप्रपाबीच चुनावी तालमेल भएको छ । त्यस अनुसार ३ क मा एमालेले राप्रपाका जोशीलाई सघाउने भएको छ । प्रतिनिधि सभा र प्रदेश सभा ख मा भने राप्रपाले एमाले उम्मेदवारलाई सघाउने भएका छन् ।

भीमदत्त नगरपालिका (तत्कालिन महेन्द्रनगर नगर पञ्चायत) मा दुई कार्यकाल प्रधान पञ्च जितेका उनी बहुदल आएपछि भएका सबै निर्वाचनमा पराजित भएका छन् ।

२०४९ को स्थानीय निकाय निर्वाचनमा मेयर लडेर हारेका उनले त्यसपछि निर्वाचनमा जितका लागि संघर्ष गर्दैै आएका छन् । अहिले एमाले सहयोगमा उनी चुनाव जित्ने आशाका साथ चुनावी मैदानमा आएका छन् ।