कैलालीमा छुट्टाछुट्टै दुर्घटनामा २ जनाको मृत्यु

महेन्द्रनगर:

कैलालीमा कैलालीमा छुट्टाछुट्टै दुर्घटनामा २ जनाको मृत्यु भएको छ । गोदावरी नगरपालिका र घोडाघोडी नगरपालिकामा भएको दुर्घटनामा २ जनाले ज्यान गुमाएका हुन् । गोदावरी नगरपालिका ८ स्याउले चोकस्थित पुर्वपश्चिम राजमार्गमा ट्रकको ठक्करबाट पैदल यात्रुको मृत्यु भएको प्रहरीले जनाएको छ । नाम र ठेगाना नखुलेका र अन्दाजी २५ वर्षीय पुरुषको मृत्यु भएको प्रदेश ट्राफिक प्रहरी कार्यालय अत्तरियाले जनाएको छ । ना ६ ख ५३६६ नम्बरको मालवाहक ट्रकले आइतबार राति साढे ३ बजेको समयमा ठक्कर दिएको प्रहरीले जनाएको छ । ट्रक चालक कपिलवस्तु ९ भर्तापुरका २५ वर्षीय सैलेश नेपालीलाई ट्रकसहित इलाका प्रहरी मालाखेतीले नियन्त्रणमा लिएको छ । यस्तै, अर्काे दुर्घटनामा मोटरसाइकल एकआपसमा ठोक्किँदा एक जनाको मृत्यु भएको छ भने, ३ जना गम्भीर घाइते भएका छन् । नम्बर नखुलेको अनटेस्ट मोटरसाइल, से ६ प ६९० नम्बरको अर्का मोटरसाइकल र से ६ प ९२३५ नम्बरको स्कुटी घोडाघोडी नगरपालिका वडा नम्बर १ को बेलकोटा एकआपसमा ठोक्किँदा दुर्घटना भएको हो । मृत्यु हुनेमा वडा नम्बर १ का अन्दाजी २० वर्षीय रुद्र बोहरा रहेको प्रदेश ट्राफिक प्रहरी कार्यालय अत्तरियाले जनाएको छ । यस्तै घाइते हुने सोही ठाउँका अन्दाजी ३२ वर्षीय लक्ष्मीराम चौधरी, ३० वर्षीया सुमिता चौधरी र १८ वर्षीय सन्जु शाही रहेको प्रहरीले बताएको छ । प्रहरीले घटनाको थप अनुसन्धान गरिरहेको बताएको छ ।