दार्चुलामा ९ वटा मरेका भेडा बोका सहित चार जना नियन्त्रणमा

महेन्द्रनगर:

दार्चुलामा ९ वटा भेडा बोका सहित चार जनालाई प्रहरीले नियन्त्रणमा लिएको छ । महाकाली नदीमा भारतबाट नेपालतर्फ तार्दै गरेको अवस्थामा प्रहरीले अवैध ९ वटा भेडा र बोका सहित चार जनालाई नियन्त्रणमा लिएको हो । महाकाली नगरपालिका १ को सल्लेबगरमा बुधबार राती करिब ११ बजे भारत पिथौरागढको धार्चुला गलाती भएर नेपालतर्फ तार्दै गरेको अवस्थामा चार जनालाई नियन्त्रणमा लिइएको जिल्ला प्रहरी कार्यालय दार्चुलाका प्रहरी निरीक्षक माधव विश्वकर्माले बताएका छन् । दशैंका लागि महाकाली नदी भएर बोका नेपालतर्फ तार्दै गरेको सूचना पाए लगत्तै प्रहरी निरीक्षक विश्वकर्मा नेतृत्वको टोलीले तीन बोका र ६ वटा भेडा बरामद गरेको बताइएको छ । बरामद गरिएका ९ वटै भेडा र बोका मरेका छन् । भारतबाट बिना अनुमती र परीक्षण पशुचौपायाको ओसारपसार गर्न प्रतिबन्ध गरिएको छ । बोका सार्ने कार्यमा संग्लन चार जनामाथि सोधपुछ भइरहेको प्रहरीले जनाएको छ ।