बेलौरीमा स्वच्छ पानी पाउँदा स्थानीय खुसी

महेन्द्रनगर । कञ्चनपुरमा शुद्ध पिउने पानी पाए पछि स्थानीयहरु हर्सित भएका छन् । बेलौरी नगरपालिका ४ को मोतीपुर , बरताल , बुटाबारिमा स्वच्छ पिउने पानीको व्यवस्था भएपछि स्थानीय उत्साहित भएका हुन् । शुद्ध पिउने पानीको पहुँच नपुगेका ती क्षेत्रहरूमा वडा नम्बर ४ को कार्यालयले निः शुल्क बायो फिल्टर जडान गरेपछि उनीहरु उत्साहित भएका हुन् ।
वडा कार्यालयले १५ लाखको लगानीमा एक घर एक फिल्टर कार्यक्रम सुरु गरेपछि शुद्ध पिउने पानी पिउने चाहाना पुरा भएको स्थानीय राम प्रसाद काफ्लेले बताए । ‘हामीलाई पिउने पानीको निकै ठूलो समस्या थियो । त्यो समस्या यहाँको वडाध्यक्षले हल गरिदिनुभएको छ’ उनले भने ‘स्वच्छ पिउने पानी पाएपछि हामी निकै खुसी भएका छौँ । ’
स्थानीय राम प्रसाद जैसीले निः शुल्क बायो फिल्टर जडान गरेपछि आफूहरूले स्वच्छ पानी पिउन पाएको बताए । उनले अन्य वडामा भन्दा धेरै वडा नम्बर ४ मा जन पक्षीय काम भएको बताए ।
शुद्ध पिउने पानीको पहुँच नपुगेका क्षेत्रहरूमा बायो फिल्टर जडान पनि पानीबाट लाग्ने रोगहरूबाट नागरिक बच्ने अपेक्षा गरिएको छ । स्थानीयको आवश्यकताको आधारमा बायो फिल्टर जडान कार्य सुरु गरिएको वडाध्यक्ष अर्जुन ढकालले बताए ।