बेलडाँडी गाउँपालिका खेलकुद विकास समितिको अध्यक्षमा बिक्रम  थापा

महेन्द्रनगर :

कञ्चनपुरको बेलडाँडी गाउँपालिका खेलकुद विकास समितिको अध्यक्षमा विक्रम थापा चयन भएका छन् । बेलडाँडी गाउँपालिकाले अनेरास्ववियुका विद्यार्थी नेता थापालाई गाउँपालिका खेलकुद विकास समितिको अध्यक्ष नियुक्त गरेको हो । बेलडाँडी गाउँपालिका–३ खैरीघाटका थापा राजनीतिसंगै खेलकुद विधामा पनि संक्रिय छन् । उनले बेलडाँडी गाउँपालिकाको खेल क्षेत्रमा उल्लेख्य योगदान गरेका छन् । जिल्लास्तरीय खेलकुद प्रतियोगितामा बेलडाँडी क्षेत्रबाट खेलाडीलाई सहभागी गराउन उनले महत्वपूर्ण भूमिका खेलेका छन् । उनले गत वर्ष महेन्द्रनगरमा आयोजित जिल्लास्तरीय क्रिकेट प्रतियोगितामा गाउँपालिका क्रिकेट टिमको व्यवस्थापक तथा प्रशिक्षककोे जिम्मेवारी सम्हालेका थिए । यस्तै गाउँपालिकाबाट उत्कृष्ट खेलाडी उत्पादन तथा त्यस ठाउँको खेल क्षेत्र उकास्नका लागि उनले बेला बेलामा विभिन्न खेल आयोजना गर्ने गरेका छन् । थापा राजनीतिसंगै आफू पनि खेलकुदमा रुचि राख्दछन् । सुदूरपश्चिम विश्वविद्यालयले आयोजना गरेको खेल सप्ताहमा मानविकी तथा सामाजिकशास्त्र विभागबाट खेलमा सहभागी भइ ब्याटमेन्टनमा प्रथम भएका थिए । थापा अनेरास्ववियुका केन्द्रीय सदस्य पनि हुन । ग्रामीण क्षेत्रको खेलकुद विधा उकास्नका लागि योजनाबद्ध कार्यक्रम बनाएर अगाडि बढ्ने अध्यक्ष थापाले बताए । ‘यस क्षेत्रमा उत्कृष्ट प्रतिभा भएका खेलाडीहरु छन् । तर उनीहरुले अवसर पाएका छैनन् । उनीहरुलाई खेलकुदको मूलप्रवाहमा ल्याउनका लागि विभिन्न कार्यक्रम ल्याइने छ ।’ उनले भने, ‘यस क्षेत्रका उत्कृष्ट खेलाडीहरुलाई विभिन्न स्तरीय खेलकुदामा सहभागी गराइने छ ।’